మధుమేహులకు చిలగడదుంప మేలేనా?

మధుమేహం ఉన్నవారు ఆహారం విషయంలో ఎన్నో జాగ్రత్తలు తీసుకోవాలి. ముఖ్యంగా కార్బోహైడ్రేట్లు ఎక్కువగా ఉండే పదార్థాలను ఎంత మోతాదులో తీసుకుంటున్నారో గమనించాలి. అయితే చిలగడదుంపను సరైన పరిమాణంలో తీసుకుంటే మధుమేహులు కూడా తమ ఆహారంలో భాగంగా చేర్చుకోవచ్చని నిపుణులు చెబుతున్నారు. చిలగడదుంపలో పీచు పదార్థం, పొటాషియం, బీటా కెరోటిన్‌ పుష్కలంగా ఉంటాయి. ముఖ్యంగా తొక్కతో కలిపి తింటే పీచు పదార్థం అందుతుంది. ఇది జీర్ణక్రియను నెమ్మదింపజేసి, రక్తంలో చక్కెర స్థాయులు వేగంగా పెరగకుండా తోడ్పడవచ్చు.

ఇందులోని రెసిస్టెంట్‌ స్టార్చ్‌ కూడా రక్తంలో చక్కెర నియంత్రణకు సహకరించవచ్చని నిపుణులు వివరించారు. చిలగడదుంపను వెన్నతో కలిపి తీసుకోవడం వల్ల ఆహారం గ్లైసెమిక్‌ ప్రభావం తగ్గవచ్చని అంటున్నారు. వెన్నలోని కొవ్వు పదార్థాలు జీర్ణక్రియ వేగాన్ని ప్రభావితం చేయగలవని తెలిపారు. అయితే వెన్నలో సంతృప్త కొవ్వులు అధికంగా ఉండటంతో దాన్ని పరిమితంగానే తీసుకోవాలని సూచిస్తున్నారు. చిలగడదుంపలోని పోషకాలు గుండె ఆరోగ్యానికీ తోడ్పడవచ్చని, కానీ దీనిని తినడం వల్ల మధుమేహం నయమవుతుందని భావించకూడదని స్పష్టంచేస్తున్నారు.