వెన్నముద్దల బతుకమ్మ ప్రత్యేకత ఇదే..

తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగలో ఎనిమిదో రోజు ఎంతో ప్రత్యేకమైనది. ఈ రోజును వెన్నముద్దల బతుకమ్మగా జరుపుకుంటారు. తొమ్మిది రోజుల బతుకమ్మ వేడుకల్లో భాగంగా మహిళలు, ఆడపడుచులు సంప్రదాయబద్ధంగా బతుకమ్మలను పేర్చి, గౌరమ్మకు ప్రత్యేక పూజలు నిర్వహిస్తారు. వెన్నతో చేసిన ముద్దలు లేదా వెన్నకు సంబంధించిన నైవేద్యాలను అమ్మవారికి సమర్పించి భక్తిశ్రద్ధలతో పూజిస్తారు.

బతుకమ్మ పండుగలో ప్రతి రోజుకు ఒక ప్రత్యేకమైన పేరు, నైవేద్యం ఉంటాయి. ఆ సంప్రదాయంలో భాగంగానే ఎనిమిదో రోజును వెన్నముద్దల బతుకమ్మగా పిలుస్తారు. తెలంగాణలోని మహిళలు తెల్లవారుజాము నుంచే పండుగ ఏర్పాట్లలో నిమగ్నమవుతారు. వివిధ రకాల రంగురంగుల పూలతో బతుకమ్మలను అందంగా పేర్చి, ఇంటి ముందు లేదా ఆలయాల వద్ద పూజలు నిర్వహిస్తారు. అనంతరం సాయంత్రం వేళ మహిళలంతా ఒకచోట చేరి బతుకమ్మ చుట్టూ వలయంగా తిరుగుతూ సంప్రదాయ పాటలు పాడుతారు.