అరుదైన రికార్డ్ క్రియేట్ చేసిన తిలక్ వర్మ

భారత యువ క్రికెటర్ తిలక్ వర్మ టీ20 అంతర్జాతీయ క్రికెట్‌లో తన పేరుతో మరో అరుదైన రికార్డును లిఖించుకున్నాడు. ఫీల్డింగ్‌లోనూ తన సత్తా చాటుతూ టీ20ల్లో 50 క్యాచ్‌లు అందుకున్న ఐదో భారత ఆటగాడిగా నిలిచాడు. అంతే కాకుండా, ఈ రికార్డ్ ను అతి తక్కువ మ్యాచ్‌ల్లోనే చేరుకున్న భారత ఫీల్డర్‌గా ప్రత్యేక గుర్తింపు సాధించాడు. వెస్టిండీస్‌తో ఆదివారం ఇండోర్‌లో జరిగిన మూడో టీ20 మ్యాచ్‌లో తిలక్ ఈ ఘనతను అందుకున్నాడు. తిలక్ వర్మ తన అంతర్జాతీయ టీ20 కెరీర్‌లో కేవలం 68 మ్యాచ్‌ల్లోనే 50 క్యాచ్‌లు అందుకోవడం విశేషం. ప్రతి మ్యాచ్‌లోనూ బ్యాటింగ్‌తో పాటు ఫీల్డింగ్‌లోనూ జట్టుకు తన వంతు సహకారం అందించాడు. ముఖ్యంగా ఔట్‌ఫీల్డ్‌లో క్యాచ్‌లు పట్టడంలో అతడు చూపిస్తున్న చురుకుదనం, ఏకాగ్రత ఈ రికార్డుకు కారణమయ్యాయి. అంతర్జాతీయ స్థాయిలో ఈ గణాంకంలో యూఏఈ ఆటగాడు మహమ్మద్ వసీమ్ మాత్రమే తిలక్ కంటే ముందున్నాడు.

టీ20 అంతర్జాతీయ క్రికెట్‌లో భారత్ తరఫున అత్యధిక క్యాచ్‌లు అందుకున్న ఆటగాళ్ల జాబితాలో తిలక్ వర్మ ఐదో స్థానాన్ని సంపాదించాడు. రోహిత్ శర్మ: 65 క్యాచ్‌లు, హార్దిక్ పాండ్యా: 64 క్యాచ్‌లు, సూర్యకుమార్ యాదవ్: 58 క్యాచ్‌లు, విరాట్ కోహ్లీ : 54 క్యాచ్‌లు, తిలక్ వర్మ: 50 క్యాచ్‌లు.. ఈ జాబితాలో అనుభవజ్ఞులైన ఆటగాళ్ల సరసన తిలక్ చోటు సంపాదించడం అతడి ఫీల్డింగ్ సామర్థ్యానికి నిదర్శనంగా నిలుస్తోంది. భవిష్యత్తులోనూ ఇదే స్థాయి ప్రదర్శన కొనసాగిస్తే, అత్యధిక క్యాచ్‌లు అందుకున్న భారత ఆటగాళ్ల జాబితాలో మరింత ముందుకు వెళ్లే అవకాశం ఉంది.