డబుల్‌ డయాబెటిస్‌.. ఎంత డేంజర్?

మధుమేహంలో మరో కీలక ఆరోగ్య సమస్యగా ‘డబుల్‌ డయాబెటిస్‌’ ఇప్పుడు విస్తృతంగా చర్చనీయాంశమవుతోంది. టైప్‌–1 డయాబెటిస్‌ ఉన్నవారిలో ఇన్సులిన్‌ నిరోధకత కూడా అభివృద్ధి చెందడాన్ని ఈ పేరుతో పిలుస్తారు. దీనివల్ల రక్తంలో చక్కెర స్థాయులను నియంత్రించడం కష్టమవడంతో పాటు, ఇన్సులిన్‌ అవసరం పెరిగే అవకాశం ఉంటుంది. అధిక బరువు, పొట్ట చుట్టూ కొవ్వు పేరుకుపోవడం, శారీరక శ్రమ తగ్గడం, కుటుంబంలో టైప్‌–2 మధుమేహ చరిత్ర ఉండటం వంటి అంశాలు ఈ సమస్యకు దోహదపడవచ్చు. రక్తంలో చక్కెర స్థాయులు అదుపులోకి రాకపోవడం, ఇన్సులిన్‌ మోతాదు పెంచాల్సి రావడం, రక్తపోటు, కొలెస్ట్రాల్‌ స్థాయుల్లో మార్పులు దీని హెచ్చరిక సంకేతాలు కావచ్చు. ఈ పరిస్థితి గుండె, రక్తనాళాలు, మూత్రపిండాలు, కళ్ల ఆరోగ్యంపై ప్రభావం చూపే ప్రమాదం ఉంది. అయితే ఇన్సులిన్‌ అవసరం పెరిగినంత మాత్రాన డబుల్‌ డయాబెటిస్‌ ఉన్నట్లు నిర్ధారించలేమని వైద్యులు సూచిస్తున్నారు. వైద్య పరీక్షలతో సమస్యను గుర్తించి, ఆహార నియంత్రణ, వ్యాయామం, బరువు నిర్వహణతో పాటు వైద్యుల సూచన మేరకు చికిత్స తీసుకోవడం అవసరం.