వరల్డ్ బుక్ ఆఫ్ రికార్డ్స్‌లో శ్రీశైలం జలాశయం..

ఆంధ్రప్రదేశ్‌కు చెందిన శ్రీశైలం జలాశయం మరో అరుదైన ఘనతను సొంతం చేసుకుంది. ప్రతిష్ఠాత్మకమైన వరల్డ్ బుక్ ఆఫ్ రికార్డ్స్‌లో శ్రీశైలం ప్రాజెక్టుకు చోటు దక్కినట్లు సమాచారం. దేశంలో ఈ గుర్తింపు పొందిన తొలి ప్రాజెక్టుగా శ్రీశైలం చరిత్ర సృష్టించినట్లు వెల్లడైంది. భారీ పరిమాణంలో ఉన్న గేట్లు, గతంలో వచ్చిన రికార్డు స్థాయి వరద ప్రవాహాన్ని సమర్థంగా తట్టుకున్న సామర్థ్యం ఈ గుర్తింపునకు ప్రధాన కారణాలుగా పేర్కొంటున్నారు. కృష్ణా నది పై నిర్మించిన ఈ ప్రాజెక్టు ఆంధ్రప్రదేశ్‌తో పాటు తెలంగాణకు కూడా ఎంతో కీలకమైనది. సాగునీటి అవసరాలు తీర్చడం, తాగునీటి సరఫరా, విద్యుత్ ఉత్పత్తి వంటి అనేక రంగాల్లో శ్రీశైలం జలాశయం కీలక పాత్ర పోషిస్తోంది.

ఈ ప్రాజెక్టులో ఏర్పాటు చేసిన గేట్లు ప్రత్యేకతను కలిగి ఉన్నాయి. ఒక్కో గేటు సుమారు 60 అడుగుల వెడల్పు, 55 అడుగుల ఎత్తుతో ఉండటం విశేషం. దక్షిణాసియాలో ఈ తరహా భారీ గేట్లు ఉండటం ప్రాజెక్టు ప్రత్యేకతగా నిలిచింది. భారీ వరద ప్రవాహాన్ని సమర్థంగా తట్టుకున్న అంశం కూడా వరల్డ్ బుక్ ఆఫ్ రికార్డ్స్ గుర్తింపునకు కారణంగా వెల్లడైంది. ఈ గుర్తింపునకు సంబంధించిన ధ్రువపత్రాన్ని వరల్డ్ బుక్ ఆఫ్ రికార్డ్స్ సంస్థ జాయింట్ సెక్రటరీ ఇరిగేషన్ అధికారులకు అందజేసినట్లు సమాచారం.