దసరా పండగ విశిష్టత ఏంటో తెలుసా..?

దసరా లేదా విజయదశమి హిందువుల ముఖ్యమైన పండుగల్లో ఒకటి. ఆశ్వయుజ మాసంలోని శుక్ల పక్షం పదో రోజున విజయదశమిని జరుపుకుంటారు. చెడు పై మంచి, అధర్మం పై ధర్మం సాధించిన విజయానికి ప్రతీకగా ఈ పండగను భావిస్తారు. పురాణాల ప్రకారం దుర్గాదేవి మహిషాసురుడిని సంహరించిన రోజు విజయదశమి. అలాగే శ్రీరాముడు రావణుడి పై విజయం సాధించిన రోజుగా కూడా దసరాకు ప్రాధాన్యం ఉంది. అందుకే.. ఈ పండగను విజయానికి ప్రతీకగా జరుపుకుంటారు.

దసరా ముందు తొమ్మిది రోజుల పాటు దేవీ నవరాత్రులు నిర్వహిస్తారు. ఈ రోజుల్లో... అమ్మవారిని వివిధ రూపాల్లో పూజిస్తారు. పదో రోజు విజయదశమిగా ప్రత్యేక పూజలు, ఉత్సవాలు నిర్వహిస్తారు. తెలంగాణలో దసరా సందర్భంగా బతుకమ్మ వేడుకలకు ప్రత్యేక ప్రాధాన్యం ఉంది. మహిళలు రంగురంగుల పూలతో బతుకమ్మలను పేర్చి, వాటి చుట్టూ పాటలు పాడుతూ సంప్రదాయబద్ధంగా వేడుకలు జరుపుకుంటారు.

అలాగే దసరా రోజున ఆయుధ పూజ, వాహన పూజ, పుస్తకాల పూజ వంటి సంప్రదాయాలు కూడా ఉన్నాయి. కొత్త పనులు, వ్యాపారాలు ప్రారంభించడానికి విజయదశమిని శుభ దినంగా భావిస్తారు. ఒక్క మాటలో చెప్పాలంటే.. మనకు “ఎన్ని కష్టాలు ఎదురైనా చివరికి ధర్మమే గెలుస్తుంది” అనే సందేశాన్ని అందించే పండగ.. దసరా పండగ.