రోజూ సోయా మిల్క్‌ తాగితే.. ఆరోగ్యానికి ఎలాంటి ప్రయోజనాలు?

పాలు తాగలేని వారు, లాక్టోస్‌ అసహనం ఉన్నవారికి సోయా మిల్క్‌ మంచి ప్రత్యామ్నాయంగా ఉపయోగపడుతుంది. సోయాబీన్స్‌తో తయారయ్యే ఇందులో మొక్కల ఆధారిత ప్రొటీన్‌ పుష్కలంగా ఉంటుంది. ఒక కప్పు సోయా మిల్క్‌లో సుమారు 8 గ్రాముల ప్రొటీన్‌ లభిస్తుంది. సోయా ప్రొటీన్‌ను ఇతర ప్రొటీన్‌లకు బదులుగా తీసుకోవడం వల్ల కొలెస్ట్రాల్‌ స్థాయిలు స్వల్పంగా తగ్గే అవకాశం ఉందని అధ్యయనాలు సూచిస్తున్నాయి. అలాగే సోయాలోని ఐసోఫ్లేవోన్లు రక్తపోటుపై స్వల్ప సానుకూల ప్రభావం చూపవచ్చని నేషనల్‌ సెంటర్‌ ఫర్‌ కాంప్లిమెంటరీ అండ్‌ ఇంటిగ్రేటివ్‌ హెల్త్‌ పేర్కొంది. కాల్షియం, విటమిన్‌ డీతో ఫోర్టిఫై చేసిన సోయా మిల్క్‌ ఎముకల ఆరోగ్యానికి కూడా ఉపయోగపడుతుంది. ముఖ్యంగా చక్కెర కలపని సోయా మిల్క్‌ ఎంచుకోవడం మంచిది. అయితే సోయాకు అలర్జీ ఉన్నవారు దూరంగా ఉండాలి. కొందరిలో అధికంగా తీసుకోవడం వల్ల ఉబ్బరం, మలబద్ధకం, విరేచనాలు వంటి సమస్యలు రావచ్చు.