తెలంగాణలో 5 చోట్ల రోప్‌వేలు.. టూరిజానికి కొత్త ఊపు

తెలంగాణలో పర్యాటక రంగాన్ని మరింత అభివృద్ధి చేసేందుకు కేంద్ర ప్రభుత్వం కీలక ముందడుగు వేసినట్లు సమాచారం. రాష్ట్రంలోని ఐదు ప్రముఖ పర్యాటక, ఆధ్యాత్మిక, చారిత్రక ప్రాంతాల్లో రోప్‌వేల నిర్మాణానికి అనుమతులు లభించినట్లు తెలుస్తోంది. పర్వతమాల పథకం కింద సుమారు రూ.1,230 కోట్ల అంచనా వ్యయంతో ఈ ప్రాజెక్టులను చేపట్టేందుకు ప్రతిపాదనలు సిద్ధమయ్యాయి. ఈ రోప్‌వేలు అందుబాటులోకి వస్తే.. పర్యాటకులకు ప్రయాణం సులభం కావడంతో పాటు ఆయా ప్రాంతాల్లో పర్యాటక కార్యకలాపాలు మరింత పెరిగే అవకాశం ఉంది.

తెలంగాణలో రోప్‌వేలు ఏర్పాటు చేయనున్నట్లు పేర్కొంటున్న ప్రాంతాల్లో యాదగిరిగుట్ట, నాగార్జునకొండ, పెద్దపల్లి జిల్లాలోని రామగిరి కోట, నల్గొండలోని హనుమాన్ హిల్, డిచ్‌పల్లిలోని ఖిల్లా రామాలయం ఉన్నాయి. ఈ ప్రాంతాలకు ప్రతిరోజూ భక్తులు, పర్యాటకులు పెద్ద సంఖ్యలో వస్తుంటారు. ముఖ్యంగా కొండలపై ఉన్న ఆలయాలు, చారిత్రక కట్టడాలకు చేరుకోవడానికి కొన్ని చోట్ల ప్రయాణం కష్టంగా ఉంటుంది. రోప్‌వే సదుపాయాలు ఏర్పాటైతే ఈ సమస్యకు కొంత వరకు పరిష్కారం లభించే అవకాశం ఉంది. అలాగే ఆయా ప్రాంతాల్లో పర్యాటక రంగానికి మరింత ప్రోత్సాహం లభించనుంది.