సగ్గుబియ్యమా.. సామ బియ్యమా.. కుట్టు పిండా? ఆరోగ్యానికి ఏది మేలు?

ఉపవాస సమయంలో తీసుకునే ఆహారంలో సగ్గుబియ్యం, సామ బియ్యం, కుట్టు పిండి ప్రముఖంగా ఉంటాయి. అయితే పోషక విలువలు, రక్తంలో చక్కెర స్థాయులపై ప్రభావం పరంగా వీటి మధ్య తేడాలు ఉన్నాయని నిపుణులు చెబుతున్నారు. కుట్టు పిండిలో ప్రొటీన్లు, ఫైబర్‌, ఐరన్‌, జింక్‌ వంటి పోషకాలు సమృద్ధిగా ఉంటాయి. ఇవి ఎక్కువసేపు కడుపు నిండిన భావన కలిగించడంతోపాటు రక్తంలో చక్కెర స్థాయులు స్థిరంగా ఉండేందుకు తోడ్పడతాయి. సామ బియ్యంలో ఫైబర్‌, ఐరన్‌, మెగ్నీషియం, ఫాస్ఫరస్‌ వంటి పోషకాలు లభిస్తాయి. ఇది ఉపవాస సమయంలో శక్తిని అందించడంలో ఉపయోగపడుతుంది. మరోవైపు, సగ్గుబియ్యంలో కార్బోహైడ్రేట్లు అధికంగా ఉన్నప్పటికీ.. ప్రొటీన్లు, ఫైబర్‌ తక్కువగా ఉంటాయి. దీనిని అధికంగా తీసుకోవడం, ముఖ్యంగా నూనెలో వేయించిన వంటకాల రూపంలో తినడం వల్ల పోషక సమతుల్యత దెబ్బతినే అవకాశం ఉంది.

రక్తంలో చక్కెర వేగంగా పెరిగే ప్రమాదం కూడా ఉంటుంది. ఈ మూడింటిలో పోషక విలువల పరంగా కుట్టు పిండికి ప్రాధాన్యం ఇవ్వవచ్చని నిపుణులు అంటున్నారు. సామ బియ్యం కూడా మంచి ప్రత్యామ్నాయం. వీటిని పెరుగు, పనీర్‌, వేరుశెనగ వంటి ప్రొటీన్లు అందించే ఆహారాలతో కలిపి తీసుకుంటే ఉపవాస భోజనం మరింత సమతుల్యంగా ఉంటుంది. వీలైనంత వరకు నూనెలో బాగా వేయించిన వంటకాలను తగ్గించడం మంచిదని నిపుణులు సూచిస్తున్నారు.